《第二集 - 全家總動遊 の hea爆沖繩》
今次我哋6日5夜，由名護作起點，一共住3間酒店。
第一二晚，我哋入住位於距離名護市10分鐘車程嘅【金秀喜瀨海灘皇宮飯店 (Kanehide Kise Beach Palace) 】，呢間酒店有個私人沙灘，可以向酒店預訂潛水及水上活動，但由於我哋4月份去，天氣有啲凍，所以冇book。另外因為正值一年一度嘅沖繩煙節，所以房價比平時季節貴咗少少，大約$930左右（一般大約$600-800不等）。
全家人去旅行，今次行程都係揀咗大路為主，第二日我哋去【美麗水族館】，有咩玩唔多講喇，相信大家比我熟，不過令包包最難忘嘅就係餵海豚初體驗，最衰唔夠時間去元氣村摸海豚啦，如果唔係會更難忘，留返下次啦！
另外，我哋去咗老字號沖繩麵店【岸本食堂】（創於1905年）。主打手打沖繩麵，佢哋用灰汁（天然鹼水）而非鹼水製麵，店家會將燒木柴後留低嘅木灰放入水中，令木溶出鹼後靜置，接著再用上層清澈嘅灰汁去製作木灰麵。咁樣製成嘅麵，就做到鹼水做不出的獨特口感同嚼勁，講咬口真係要有啲口力先得。（記得預早去，要排隊...）
晚上，我哋去咗【燒肉本部牧場(焼肉もとぶ牧場)】食石垣牛，一個字：「唔夠喉！」，相信下次再去沖繩我都會再去食過，環境同氣氛都好好，食物好正！
今次講住咁多先！
密切留意嚟緊更多集嘅《全家總動遊 の hea爆沖繩》喇！
「 hea爆」重温：
【全家總動遊沖繩 1】租車 行程App推介▼▼
https://youtu.be/H-xBegJnyWU
#沖繩 #okinawa #黑面媽 #親子遊 #沖繩親子遊 #全家總動遊 #hea爆沖繩 #旅遊 #旅遊制作
